İslam Əməkdaşlıq Təşkilatının Xarici İşlər Nazirləri Şurasının İslamabadda keçirilən 48-ci sessiyasında Ermənistanın Azərbaycana qarşı təcavüzünü pisləyən qətnamələrin qəbulu islamofobiyaya qarşı birgə mübarizənin də təzahürüdür
Müxtəlif beynəlxalq təşkilatlarda layiqincə təmsil olunan Azərbaycan islam ölkələrini birləşdirən İqtisadi Əməkdaşlıq Təşkilatında, İslam Əməkdaşlıq Təşkilatında fəal iştirak edir. Əsas məqsədi müsəlman ölkələri arasında siyasi, iqtisadi, ticari, mədəni əlaqələrin möhkəmləndirilməsi, islamofobiyaya qarşı birgə mübarizəni gücləndirmək olan hər iki təşkilatın üzv dövlətləri artıq tarixə qovuşan Dağlıq Qarabağ münaqişəsinin davam etdiyi 30 ildə daim Azərbaycanın yanında olmuş, ölkəmizin ərazi bütövlüyünü dəstəklədiklərini qəbul etdikləri rəsmi qətnamələri ilə bildirmişlər. Postmüharibə dövründə Azərbaycana səfərləri zamanı 30 il Ermənistanın işğalı altında qalan ərazilərdə erməni vandallarının törətdikləri vəhşilikləri pisləyən, dini abidələrimizi, məscidlərimizi dağıdan erməni quldurlarını lənətləyən hər iki təşkilatın üzvləri bu qəddarlığı İslami dəyərlərə hörmətsizlik adlandırmışlar. Ulu öndər Heydər Əliyevin təşəbbüsü kimi Bakıda çoxşaxəli əməkdaşlığın platforması adlandırılan İqtisadi Əməkdaşlıq Təşkilatının Tədqiqat Mərkəzinin yaradılmasını, Nizamnaməsinin imzalanmasını, Azərbaycanın İkinci Qarabağ müharibəsində qazandığı Qələbəni İslam aləminin Zəfəri kimi dəyərləndirən təşkilat üzvləri qarşıdakı vəzifələrin daha möhtəşəm olacağını bildirmişlər.
İqtisadi Əməkdaşlıq Təşkilatının XIV onlayn qaydada keçirilən Zirvə toplantısındakı çıxışındakı «Türkiyə bizim qardaşımızdır. Türkiyə bizim böyük müttəfiqimizdir. Azərbaycan xalqı Türkiyə kimi müttəfiqi olmasından çox məmnundur. Azərbaycan və Türkiyə xalqları və əminəm ki, dünyada bir çoxları Prezident Ərdoğanın Türkiyənin yalnız dünyada ən önəmli güc mərkəzlərindən birinə çevrilməsində deyil, eləcə də regionda təhlükəsizliyin təmin edilməsindəki tarixi rolundan açıq şəkildə xəbərdardırlar. Türkiyə geniş regionda təhlükəsizlik və sabitliyin təmin olunmasında çox önəmli rol oynayır» sözləri ilə Azərbaycan-Türkiyə münasibətlərini İslam həmrəyliyinin lokomotivi kimi dəyərləndirən Prezident İlham Əliyev Vətən müharibəsi başlandığı ilk günlərdən Azərbaycanın yanında olan qardaş Türkiyənin İslam həmrəyliyinin möhkəmlənməsindəki rolunu da yüksək qiymətləndirmişdir. Qeyd olunmuşdur ki, İslami dəyərləri təhqir edən Ermənistanın müsəlman ölkələri ilə əlaqələrini genişləndirmək cəhdləri riyakarlıqdan başqa bir şey deyil. Humanitar çağırışların, təşəbbüslərin müəllifi kimi tanınan Azərbaycan islamofobiyaya qarşı mübarizədə fəal iştirak etməklə multikultural dəyərlərə malik tolerant dövlət olduğunu əməli fəaliyyəti ilə təsdiqləyir. İşğaldan azad olunmuş ərazilərimizdə aparılan bərpa-quruculuq işlərinə, dini abidələrimizin bərpasına yardım etmək istəyən müsəlman ölkələrinin Azərbaycana müraciətləri türk həmrəyliyinin ifadəsidir.
İki ildən artıq müddətdə davam edən COVID-19 pandemiyası ilə mübarizədə qlobal səyləri səfərbər edən, sədrlik etdiyi Türk Şurasının və Qoşulmama Hərəkatının Zirvə toplantılarının, eləcə də BMT Baş Assambleyasının dövlət və hökumət başçıları səviyyəsində Xüsusi Sessiyasının keçirilməsinin təşəbbüskarı olan Azərbaycanın beynəlxalq həmrəyliyə və əməkdaşlığa verdiyi töhfələrdən müsəlman ölkələri də bəhrələnmişlər.
Reallaşdırdığı qlobal neft-qaz layihələrinin müəllifi olmaqla Avrasiyanın etibarlı nəqliyyat- logistika mərkəzinə çevrilən Azərbaycanın nəqliyyat infrastrukturunun Lapis Lazuli dəhlizi ilə birləşdirilməsi ilə bağlı təklifləri müsəlman ölkələri arasında çoxtərəfli əməkdaşlıq üçün geniş imkanlar yaradır. Türk dünyasını birləşdirəcək, İqtisadi Əməkdaşlıq Təşkilatının üzv dövlətlərinin də faydalanacağı daha önəmli layihə Azərbaycanın tarixi ərazisi olan Zəngəzurdan keçəcək avtomobil və dəmir yolunun bərpasıdır.
Bu yolun əhəmiyyətini «Zəngəzur dəhlizi bütün bölgə üçün əhəmiyyətli fürsət olacaq. Burada inşa olunacaq avtomobil və dəmir yolu xətləri bütün bölgə ölkələri üçün ticari-iqtisadi imkanlar yaradacaq» sözləri ilə bildirən Türkiyənin Prezidenti Rəcəb Tayyib Ərdoğanın vurğuladığı kimi, Azərbaycan bu dəhlizin reallaşması üçün siyasi iradə , qətiyyət göstərir. Bildirilir ki, İstanbula qədər uzanacaq bu nəqliyyat infrastrukturu əsl mənada dostluq, birlik, həmrəylik yolu olacaq. Prezident İlham Əliyev Zəngəzur dəhlizinin əhəmiyyətindən bəhs edərkən qətiyyətlə bildirir ki, tarixi, strateji maraqlarımız kontekstində mühüm əhəmiyyətə malik, bütövlükdə regionda inteqrasiya proseslərini stimullaşdıracaq Zəngəzur dəhlizi Ermənistan istəsə də , istəməsə də açılacaq. Çünki Zəngəzur sadəcə kommunikasiyaların keçəcəyi dəhliz deyil, azərbaycanlıların tarixi Vətənidir. Dünənimiz olduğu kimi həm də sabahımızdır. Prezident İlham Əliyevin «Əgər biz Zəngəzur dəhlizinə qayıdırıqsa, əgər biz bu yolu istifadə ediriksə niyə də biz İrəvana qayıtmayaq. Zaman gələcək, biz bunu edəcəyik» sözlərindən qorxan Ermənistanın revanşistləri Azərbaycanla İran arasında yeni kommunikasiya bağlantılarının yaradılması haqqında Anlaşma Memorandumunun imzalanmasından, Şərqi Zəngəzur-Naxçıvan ticarət dəhlizinin bərpasından narahat olsalar da sonda Zəfər çalan İslam həmrəyliyi oldu.
Politoloqların regional inkişafın açarı, sülhün qarantı adlandırdıqları, «Türkiyə ilə Azərbaycan arasında Müttəfiqlik Münasibətləri haqqında» Şuşa, Türkiyənin, Azərbaycanın , Pakistanın parlament sədrlərinin imzaladıqları Bakı Bəyannamələri İslam aləminin həmrəylik coğrafiyasını daha da genişləndirdi. İslami dəyərlərə ləkə , kölgə salmağa çalışan qərəzli dairələrə qarşı etibarlı ideoloji silah olan hər iki Bəyannamə bütünlükdə türk dünyası ölkələrinin siyasi, iqtisadi, ticari, mədəni, tarixi əlaqələrinin yeni istiqamətlərini özündə ehtiva etməklə İslam dünyasının bəşər sivilizasiyasına bəxş etdiyi milli dəyərlərimizin beynəlxalq aləmdə təbliğinə də imkan yaratdı.
İkinci Qrabağ müharibəsindən sonra işğaldan azad edilmiş Azərbaycan ərazilərinə səfər edən, Səudiyyə Ərəbistanı, Bəhreyn, Misir, Pakistan, İraq, Mavritaniya, Mərakeşdən olan, eləcə də İƏT-ə üzv Dövlətlərin Jurnalistləri Assosiasiyasının üzvlərinin ermənilər tərəfindən dağıdılmış Füzuli, Şuşa və Ağdamda olmaları, Ermənistanın silahlı qüvvələrinin törətdikləri vəhşilikləri beynəlxalq ictimaiyyətə çatdırmaları müsəlman ölkələrinin sarsılmaz birliyinin ifadəsidir.
İslam Əməkdaşlıq Təşkilatının Xarici İşlər Nazirləri Şurasının cari ilin martın 22-23-də keçirilən 48-ci sessiyasında da Ermənistanın Azərbaycana qarşı təcavüzü və Xocalı soyqırımı ilə bağlı Azərbaycanın haqlı mövqeyini dəstəkləyən dörd qətnamə qəbul edilib. Pakistanın İslamabad şəhərində keçirilən sessiyada «Birlik, ədalət və inkişaf naminə tərəfdaşlığın qurulması»” mövzusunda təşkil edilən konfransda «Ermənistanın Azərbaycan Respublikasına qarşı təcavüzünün nəticələrinin aradan qaldırılması”», «Azərbaycan Respublikasına iqtisadi yardım göstərilməsi”», «Ermənistan Respublikasının Azərbaycan Respublikasına təcavüzü nəticəsində Azərbaycanın ərazilərində İslam tarixi və mədəni ziyarətgahların dağıdılması və təhqir edilməsi», «Xocalı qırğınının qurbanları ilə həmrəylik”» adlı qətnamələrdə Ermənistanın Azərbaycana qarşı hərbi təcavüzünün acı nəticələri əks olunub. Azərbaycanın işğaldan azad olunmuş ərazilərində həyata keçirdiyi bərpa və quruculuq işlərinin əhəmiyyəti yüksək qiymətləndirilib”. Qarabağda və Şərqi Zəngəzurda erməni vandallarının törətdikləri vəhşiliklərdən, dağıdılan abidələrin bərpasında müsəlman ölkələrinin yardımından ətraflı bəhs olunur. Bu qətnamələr Ermənistanı dəstəkləyən beynəlxalq təşkilatlara, erməni yalanlarına inananlara tutarlı cavab olmaqla bildirilir ki, Azərbaycan ərazi bütövlüyünü və suverenliyini qoruya biləcək siyasi, iqtisadi, hərbi gücə, diplomatik uğurlara malik ölkədir.
