“Məlum olduğu kimi Prezident İlham Əliyev 31 dekabrda Dünya Azərbaycanlılarının Həmrəylik Günü və Yeni İl münasibətilə xalqa müraciətində 2022-ci ili “Şuşa ili” elan etdi. Heç şübhəsiz ki, 2022-ci ilin “Şuşa İli” elan edilməsi harada yaşamasından asılı olmayaraq bütün azərbaycanlıları qürurlandırdı və hər birimiz üçün sevinc yaşadan tarixi xəbər oldu. Mədəniyyət paytaxtımız olan, böyük strateji əhəmiyyətə malik Şuşa şəhəri ilə bağlı bu cür qərarın qəbul edilməsi bir sıra hədəflər baxımından müstəsna əhəmiyyət daşıyır”.
Bu sözləri politoloq Yusif Bağırzadə 2022-ci ilin “Şuşa ili” elan edilməsi ilə bağlı danışarkən deyib.
O bildirib ki, təməli 1752-ci ildə Qarabağ xanı Pənahəli xan tərəfindən qoyulan və bu il 270 illiyi qeyd olunacaq Şuşa şəhəri zəngin inkişaf yolu keçmiş, Azərbaycanın və bütün Cənubi Qafqazın mədəni və ictimai-siyasi həyatında müstəsna rol oynamışdır. Keçən 30 ilə yaxın dövr ərzində ermənilər Şuşanın işğalını riyakarcasına onun “azad olunması” kimi qələmə verməyə çalışırdılar. Şəhərin əsasının 1752-ci ildə Qarabağ hökmdarı Pənahəli xan tərəfindən qoyulması inkarolunmaz mötəbər tarixi sənədlərdə də öz əksini tapıb. Rusiya imperiyasının yeni inzibati-ərazi bölgüsünə görə 1840-cı ildə qəza şəhəri statusunda Kaspi vilayətinin tərkibində olan Şuşanın 1843-cü il mayın 21-də imperator I Nikolay tərəfindən təsdiqlənmiş gerbində də onun ermənilərə məxsusluğunu cüzi də olsa xatırladan heç bir rəmzə təsadüf edilmir. Gerbin yuxarı hissəsində Kaspi vilayətinin simvolikası, yəni alov dilləri əks olunub, aşağı hissədə isə yaşıl çəmənlikdə çapan Qarabağ atı təsvir olunub. Bir sözlə, istər XIX, istərsə də XX əsrə dair Azərbaycan, rus və digər xarici dillərdə mövcud olan xəritələrdə, sənəd, kitab və yol göstəricilərində, eləcə də poçt göndərişlərində şəhərin adı ermənilərin iddia etdiyi kimi “Şuşi” deyil məhz Şuşa olaraq göstərilib.
Şuşa Qarabağın tacıdır. 2022-ci ilin “Şuşa İli” elan edilməsi Qarabağda sülh və təhlükəsizliyin təmin olunması baxımından böyük əhəmiyyət daşıyacaq. Eyni zamanda, bu qərar 28 illik işğal müddətində Şuşa şəhərində törədilən erməni vandalizminin dünyaya çatdırılmasında da böyük rol oynayacaq. Təbii ki, bu il Şuşanın 270 illiyi ilə əlaqədar bir sıra beynəlxalq tədbirlər keçiriləcək və həmin tədbirlərdə də dünyanın bir sıra ölkələrindən nümayəndələr iştirak edəcək ki, bu da Azərbaycan mədəniyyətinin dünyada təbliği baxımından böyük rol oynayacaq. Eləcə də bu tədbirlər zamanı Şuşanın qədim tarixi, adət-ənənələri ilə bağlı bir sıra filmlər, videoçarxlar nümayiş olunacaq, sərgilər təşkil ediləcək. Bununla da dünya ictimaiyyəti bir daha Qarabağın əsl sahibinin Azərbaycan olduğuna və erməni yalanlarının dünyada ifşasına şahidlik edəcək. Bu isə onu deməyə əsas verir ki, Prezident İlham Əliyevin bu qərarı erməni saxtakarlığını dünyaya növbəti dəfə nümayiş etdirmək, erməni yalanlarının ifşası baxımından da xüsusi əhəmiyyətə malikdir.
“Şuşa ili” bir daha təsdiqləyəcək ki, bizlər 28 il əsarətdə olsa da heç zaman sınmayan, milli kimliyimizi, qürurumuzu qoruyan Şuşamızda əbədi olacağıq. Dünya bir daha bu unikal mədəniyyət paytaxtının Azərbaycana məxsus olmasının şahidinə çevriləcək.
2022-ci ilin “Şuşa İli” elan edilməsi iqtisadi, sosial inkişaf baxımından da xüsusi əhəmiyyət daşıyır. Hazırda bütün diqqət və resurslar Şuşanın bərpasına və yenidən qurulmasına yönəlib. Əlbəttə ki, böyük iqtisadi, turizm potensialına malik olan Şuşa şəhərinin bərpası ümumilikdə Azərbaycan iqtisadiyyatına müsbət təsir edəcək.
Şuşa bir ildə biri-birindən əhəmiyyətli hadisələrə, tarixi günlərə şahidlik etdi. Ən əsası “Xarıbülbül” musiqi festivalı, Vaqif Poeziya Günlərinin keçirilməsi ənənəsi bərpa edildi. Şuşanın Cıdır düzündən səslənən Azərbaycan muğamı bütün dünyaya səs saldı. Möhtərəm Prezidentimiz ad günündə Şuşaya səfəri zamanı “Şuşa hər birimizi özünə çəkir” söyləyərək Cıdır düzündən bu mesajı da ünvanladı ki, bundan sonra bu torpaqlarda Azərbaycan xalqı əbədi yaşayacaq, bundan sonra Qarabağda Azərbaycan muğamı əbədi səslənəcək.
