İkisahil.TV-nin bugünkü müsahibi Milli Məclisin Əmək və sosial siyasət komitəsinin sədri Musa Quliyevdir
– Musa müəllim, Ulu Öndərin 1 oktyabr 2003-cü il tarixində xalqa müraciətində əksini tapan inam və etimad 18 ilin uğurlarında özünü necə təsdiqləyib?
-Ümummilli lider Heydər Əliyevin böyük müdrikliklə müəyyən etdiyi strategiyanı 2003-cü ildən inamla davam etdirən Azərbaycan Prezidenti İlham Əliyevin son 18 ildə ölkəyə rəhbərlik fəaliyyətini diqqətlə nəzərdən keçirsək, dövlət başçısının fəaliyyətində bu şərtlərin özünü necə dəqiqliklə doğrultduğunu əyani şəkildə görərik. 18 il zaman baxımından qısa dövr olsa da uğurların miqyasına və onların zirvəsində dayanan Zəfərimizə diqqət yetirdikdə böyük qürur hissi keçiririk. Prezident İlham Əliyev xalqa verdiyi vədləri bütünlüklə yerinə yetirdi. Ölkəmizə rəhbərlik etdiyi 18 ildə bütün sahələrdə sürətli inkişafa nail oldu, insanların rifah halı daha da yaxşılaşdı. Azərbaycanın siyasi, iqtisadi imkanları genişləndirildi, ölkəmizin beynəlxalq arenadakı mövqeləri möhkəmləndi və 30 ilin torpaq həsrətinə son qoyularaq ərazi bütövlüyümüz bərpa edildi. Bu gün regionda reallaşdırılan bütün irimiqyaslı beynəlxalq layihələr Azərbaycanın iştirakı və milli maraqlarının nəzərə alınması ilə həyata keçirilir. Reallıqlar bir daha təsdiqləyir ki, liderlik fenomeni milli dövlətin formalaşmasında və inkişafında həlledici rola malikdir. Lider, həmçinin mənəvi birliyi təmin edən, cəmiyyətdə müəyyən əhval-ruhiyyənin, ideya və dəyərlər sisteminin formalaşmasına təsir göstərən böyük qüvvədir. Məhz bu keyfiyyətlərin sayəsində ölkəmizdə siyasi sabitlik təmin olundu və gələcək inkişaf üçün zəmin yaradıldı.
-Cənab İlham Əliyev ulu öndər Heydər Əliyevin şah əsəri olan müasir müstəqil Azərbaycana ən yüksək zirvələri fəth etdirir. Bu gün üçrəngli bayrağımızın işğaldan azad olunmuş torpaqlarımızda dalğalanması sizdə hansı hissləri yaradır?
–Təbii ki, böyük fəxarət hissi. Son18 illik zamana diqqət yetirdikdə ancaq qürur hissi keçiririk. «Müasir dünyada hüququn gücü deyil, gücün hüququ işləyir və güclüsənsə haqlısan məntiqi hökm sürür» deyən Prezident İlham Əliyev böyük uzaqgörənlik nümayiş etdirərək ordu quruculuğu məsələlərini prioritet sahə kimi müəyyən etmiş və bu istiqamətdə möhtəşəm addımların atılmasını təmin etmişdir. Olkəmizin büdcə zərfində müdafiə xərcləri hər zaman üstün mövqeyə malik olmuşdur. 44 günlük Vətən müharibəsində Azərbaycan möhtərəm Prezident, Müzəffər Ali Baş Komandan İlham Əliyevin rəhbərliyi ilə qalib dövlət kimi dünyaya öz gücünü göstərmişdir. Bu gün Müzəffər Ali Baş Komandan İlham Əliyev dünyanın tanınmış ictimai-siyasi xadimləri tərəfindən haqlı olaraq müharibə və sülh dövrünün qəhrəmanı kimi qiymətləndirilir. Böyük fəxr hissi ilə qeyd edirik ki, Ümummilli Liderin müstəsna xidmətləri sayəsində formalaşan və inkişaf edən Azərbaycan Silahlı Qüvvələri Müzəffər Ali Baş Komandan İlham Əliyevin rəhbərliyi altında öz xalqına Qələbəni bəxş etmiş müzəffər orduya çevrilib. Planlı və ardıcıl şəkildə görülmüş işlər Azərbaycan Ordusunu dünyanın ən güclü 50 ordusu sırasına yüksəltdi. Ötən dövrdə Silahlı Qüvvələrin maddi-texniki təchizatının yenilənməsi, müasir infrastrukturun yaradılması, həmçinin müdafiə sənayesinin inkişaf etdirilməsinə Prezident İlham Əliyev tərəfindən xüsusi diqqət ayrılıb. Azərbaycanda son illərdə formalaşan və dinamik inkişaf edən hərbi sənaye hesabına müxtəlif növ hərbi texnika, zirehli maşınlar, pilotsuz uçuş aparatları, atıcı silahlar istehsal olunur. Azərbaycan öz zavodlarında istehsal etdiyi hərbi təyinatlı məhsullarla ordumuzu əhəmiyyətli dərəcədə təchiz edə bilir. Azərbaycan Ordusu gücü, qüdrəti sayəsində beynəlxalq hüququn mövcudluğunu bütün aparıcı dövlətlərə, nüfuzlu beynəlxalq təşkilatlara sübut etdi. Azərbaycan yeni reallıqlar yaratdı. O reallıqlar ki, erməni yalanlarını, mifini dağıtdı, dünyaya göstərildi ki, yenilməz ordu Azərbaycan Ordusu, məğlubedilməz xalq Azərbaycan xalqıdır. Azərbaycan ədaləti, haqqı bərpa edərək dünyaya sözün əsl mənasında həm tarix, həm də hüquq dərsi keçdi.
– Hazırda işğaldan azad edilmiş regionlarımızda genişmiqyaslı abadlıq-quruculuq işləri, yenidənqurma fəaliyyəti həyata keçirilməkdədir. Əldə edilmiş uğurlu nəticələrlə bağlı nə deyərdiniz?
-Bu gün Azərbaycan dünya miqyasında ən sürətlə inkişaf edən ölkələr sırasında öncül yerlərdən birini tutur. Bu inkişafın əsasında isə uğurla, uzaqgörənliklə reallaşdırılan daxili və xarici siyasət kursu dayanır. Cənab Prezident İlham Əliyevin dövlət başçısı kimi nümayiş etdirdiyi yüksək idarəçilik məharəti, qətiyyətli və milli maraqlara söykənən daxili və xarici siyasəti ilk gündən ona böyük ictimai dəstək, xalqın sonsuz inam və etibarını qazandırmışdır. Prezident İlham Əliyev isə bu gücə söykənərək, xalqın inam və etimadını istinad nöqtəsi olaraq dəyərləndirmiş, qəbul etdiyi bütün taleyüklü qərarlarda yalnız xalqın mənafeyini rəhbər tutmuşdur. Birinci növbədə, keçmiş məcburi köçkünlərimizin öz ata-baba torpaqlarına, illərlə həsrət qaldıqları yurd-yuvalarına qayıdışı nəzərdə tutulur. Azərbaycan Prezidenti İlham Əliyev son bir ildə işğaldan azad edilmiş ərazilərin iqtisadi fəaliyyətin aparıcı halqalarından birinə çevrilməsi və zamanla ölkənin digər regionlarına uyğun inkişaf səviyyəsinə çatdırılması üçün bütün zəruri tədbirləri reallaşdırır. «Azərbaycan 2030: Milli Prioritetlər» sənədinə əsasən, işğaldan azad edilmiş ərazilərin minalardan təmizlənməsindən sonra Qarabağ və Şərqi Zəngəzur iqtisadi rayonlarının dirçəldilməsi, reinteqrasiyası və inkişafı iqtisadi siyasətin əsas istiqamətlərindən biri elan edilib. Ölkə Prezidentinin həmin ərazilərə səfərləri zamanı hər bir rayon, kənd və qəsəbə üzrə genişmiqyaslı abadlıq, quruculuq prosesinin əsası qoyulur. İşğaldan azad edilmiş ərazilərin bərpası prosesinin vahid yanaşma və konsepsiya əsasında həyata keçirilməsi həmin ərazilərin qısa müddətdə müasir və abad məkana çevrilməsinə zəmin yaradır.
Prezident İlham Əliyev işğaldan azad edilmiş rayonların Baş planının hazırlanması prosesinə şəxsən nəzarət etməklə ən incə detalların belə nəzərə alınmasına, prosesin müasir şəhərsalma trendlərinə uyğunlaşdırılmasına çalışır. Bölgənin ümumi planının hazırlanması prosesi artıq yekun mərhələdədir. Azad olunmuş ərazilərdə artıq böyük inkişafın təməlləri atılır. Məqsəd yalnız ölkə səviyyəsində deyil, həm də uğurlu inteqrasiyaya nail olmaqla, regional və beynəlxalq səviyyələrdə inkişafı təmin etməkdir.
-2020-ci ildə qazandığımız tarixi Zəfərdən sonra yeni inkişaf mərhələsinə qədəm qoyan Azərbaycan pandemiyanın doğurduğu çətinliklərə rəğmən 2021-ci ili ciddi sosial-iqtisadi inkişaf göstəriciləri ilə başa vurur. Bununla bağlı nə deyərdiniz?
– İqtisadi tərəqqi amilinin müasir dünyada dövlətlərin gücünü şərtləndirən başlıca amil olduğunu düzgün müəyyənləşdirən Prezident İlham Əliyev ötən 18 ildə rəhbərlik etdiyi komandanın bütün səylərini məhz bu istiqamətə yönəldib. Müasir çağırışlara əsaslanan Strateji Yol xəritələri qeyri-neft sektoru və sahibkarlığın yüksəlişinə təkan verməklə, innovativ bilik iqtisadiyyatının formalaşmasına, insan amilinin önə çəkilməsinə və səmərəli sosial modelin tətbiqinə imkan yaradıb. Hazırda uğurla icra olunan yol xəritələri iqtisadiyyatın şaxələndirilməsi, rəqabət qabiliyyətliyinin gücləndirilməsi, neftdən asılılığın aradan qaldırılması dayanıqlı inkişafa zəmin yaradır. «Bizim siyasətimizin mərkəzində Azərbaycan vətəndaşı dayanır». Möhtərəm Prezident İlham Əliyevin dilindən dəfələrlə səslənən bu fikir ölkəmizdə həyata keçirilən sosial siyasətin mahiyyətini çox dəqiq ifadə edir. Bütün dünyada olduğu kimi, Azərbaycanda da pandemiya həm ölkə iqtisadiyyatına, həm də insanların sosial vəziyyətinə mənfi təsir göstərdi. Respublikamızda bu təsirin fəsadlarını azaltmaq üçün vaxtında praktiki addımlar atıldı. Beş milyona yaxın insan geniş sosial paketlə əhatə olundu. Həm dövlət, həm də özəl sektorda işləyənlər, həmçinin aztəminatlı təbəqəyə aid olan insanlar dövlət tərəfindən maddi dəstəklə təmin edildi. Bu, bir daha onu göstərdi ki, insanların rifahı, onların sosial vəziyyəti və əlbəttə ki, sağlamlığı dövlətimiz üçün əsas məsələdir. Xəstəliyə yoluxanların müalicəsi də diqqət mərkəzində saxlanıldı. Ölkədə 46 xəstəxana COVID xəstələrinin ixtiyarına verildi. COVID ilə mübarizədə Azərbaycanın səhiyyə sisteminin güclü maddi-texniki bazası da xüsusi rol oynadı. Bundan başqa laboratoriyaların sayı bir neçə dəfə artırıldı. Belə ki, pandemiyanın ilk vaxtlarında ölkədə cəmi 6 laboratoriya fəaliyyət göstərirdisə, az bir müddətdə onların sayı 45-ə çatdırıldı. COVID ilə mübarizədə bir Azərbaycan nümunəsi var. Vətəndaş, insan amilinin əsas götürülməsi, peyvəndlənmə prosesin yüksək səviyyədə təşkili bunun bariz nümunəsidir. Bu, həm də onu sübut etdi ki, dövlətimiz vətəndaşına biganə deyil, onun siyasətinin mərkəzində insan amili dayanır. Bu gün bütün dünyada Azərbaycan Prezident İlham Əliyevin rəhbərliyi ilə COVID-19 pandemiyasına, «peyvənd millətçiliyi»nə qarşı qlobal mübarizənin önündə gedən ölkələrdən biri kimi dəyərləndirilir, dövlət başçısının bu istiqamətdə irəli sürdüyü təşəbbüslər dəstəklənir.
