Azərbaycan Respublikasının Prezidenti İlham Əliyev Brüsseldə işgüzar səfərdə olarkən dekabrın 15-də İtaliyanın “İl Sole 24 Ore” qəzetinə müsahibə verib. Cənab Prezident müsahibəsində Avropa İttifaqı ilə Azərbaycan arasında olan siyasi və iqtisadi əlaqələrdən danışarkən bildirmişdir ki, ölkəmiz Avropa dövlətləri ilə çox yaxşı strateji əməkdaşlığa malikdir. Azərbaycanın işğal altında olan ərazilərində erməni işğalçılarının törətdikləri maddi və mənəvi terror nəticəsində Azərbaycana çox sayda ziyan dəymişdir. Bu torpaqlardan qaçqın düşmüş əhalinin geri qayıdıb məskunlaşması üçün minalanmış ərazilərin təmizlənməsinə ehtiyac vardır. Bu prosesdə Avropa İttifaqı ölkələri Azərbaycana dəstək göstərərsə daha yaxşı nəticələr əldə edə bilərik. Erməni vəhşiliklərinin canlı izlərini Avropalı jurnalistlər Ağdama və digər ərazilərə səfərləri zamanı görmüşdülər. Ermənistan təxribat xarakterli cinayətlərinə görə məsuliyyət daşıyır.
Avropada mühüm strateji coğrafi və iqtisadi əhəmiyyətə malik olan İtaliya Respublikası ilə Azərbaycan arasında çox sıx əməkdaşlıq əlaqələri mövcuddur. İtaliya ilə Azərbaycan arasında əlaqələrə dair bəzi faktlara diqqət yetirək. Qarşılıqlı ticarət dövriyyəsi 6 mlrd ABŞ dollarından çox olmaqla hazırda İtaliya ölkəmizin əsas ticarət tərəfdaşlarından biridir. Müstəqillik illərində İtaliyanın Azərbaycan iqtisadiyyatına 770 milyon ABŞ dollarından çox, Azərbaycanın isə İtaliyaya 1,7 milyard ABŞ dolları həcmində sərmayə yatırması uğurlu investisiya əməkdaşlığının göstəricisidir. Ölkələrimiz arasında iqtisadi əlaqələr əsasən neft-qaz və enerji sektorunu əhatə etsə də, son illərdə qeyri-neft sektoru üzrə də ciddi əməkdaşlıq əlaqələri qurulub. Azərbaycanda sənaye, tikinti, ticarət, kənd təsərrüfatı, rabitə, xidmət və s. sektorlarda İtaliyanın 114 şirkəti fəaliyyət göstərir. İtaliya şirkətləri həmçinin ölkəmizin neft-qaz sektorunda dəyəri 9,9 mlrd ABŞ dolları olan 277 layihədə, qeyri-neft sektorunda isə dəyəri 708 mln ABŞ dolları olan 37 layihədə podratçı kimi iştirak edirlər. Eyni zamanda Qarabağın abadlaşmasında İtaliya şirkətləri də öz töhfələrini verəcəkdir.
Zəngəzur dəhlizi layihəsinin reallaşması ilə Azərbaycanla Avropa arasında daha sıx iqtisadi, ticari və siyasi əlaqələr mövcud olacaqdır. Bu dəhliz nəinki Azərbaycanla Avropa əlaqələrinə həmçinin Asiya ilə Avropa arasında nəqliyyat koridoru və körpü rolunu oynayacaqdır. Brüsseldə aparılan danışıqlar zamanı bu dəhlizin reallaşdırılmasına bir addım da yaxınlaşılmışdır. Zəngəzur dəhlizi həm regionun, həm də Avropanın iqtisadi həyatına çox müsbət təsir göstərəcəkdir. İtaliya- Azərbaycan əlaqələri digər Avropa ölkələri üçün də bir nümunə modelidir. Bu münasibətlər bütün Avropa və Qafqaz ölkələrinin inkişafına stimul verəcəkdir. Azərbaycan Qafqazda Avropanın İttifaqının, o cümlədən İtaliyanın ən yaxın strateji tərəfdaşıdır. Avropa İttifaqı ilə ölkəmiz arasındakı yaxşı əlaqələrin mövcud olmasına vəsilə yaradan səbəblərdən biri də odur ki, Azərbaycan demokratik dəyərlərə malik ölkədir, insanların hüquq və azadlıqları qorunur, söz, mətbuat azadlığı və sərbəstliyi mövcuddur, əhalimizin çox hissəsi internet resurslarından ən maksimum dərəcədə yararlanır. Azərbaycanda əhalinin sosial mediadan istifadəsi heç də Avropa ölkələrindən geridə qalmır. Azərbaycan-İtaliya əlaqələri bundan sonra da yüksələn xətt üzrə inkişaf edəcəkdir.
Emin Sarıyev,
Pirallahı Rayon İcra Hakimiyyəti başçısı Aparatının Sənədlərlə və vətəndaşların müraciətləri ilə iş şöbəsinin məsləhətçisi
