Azərbaycan Respublikası bir dövlət olaraq öz intibah və inkişaf dövrünü Ulu Öndər Heydər Əliyevin ölkədə ikinci dəfə hakimiyyətə gəldiyi dövrdən sonra yaşamağa başlayıb. Ümummilli Liderimizin siyasi kursunun layiqli davamçısı, Müzəffər Ali Baş Komandan İlham Əliyevin dövründə isə ölkəmiz müstəqilliyinin ən güclü dövrünü yaşayır. 2018-ci ildə ölkədə sayca 8-cisi keçirilən Prezident seçkiləri zamanı İlham Əliyevin ölkədə həyata keçirdiyi uğurlu daxili və xarici siyasətin şahidi olan Azərbaycan xalqı növbəti dəfə ona yüksək etimad göstərərək İlham Heydər oğlu Əliyevi yenidən Prezident seçmişdir. 2018-ci ilin 11 aprel tarixində keçirilən növbədənkənar seçkilər zamanı vətəndaşların 74.3 % iştirak etmiş və İlham Əliyev onların 86,02 faizinin səsini qazanaraq Azərbaycan Respublikasının Prezidenti seçilmişdir. Ölkə Prezidentinin seçkilərdə qazandığı bu qələbə əslində xalqın qələbəsi, demokratiyanın qələbəsi idi. Cənab İlham Əliyevin bundan əvvəlki prezidentliyi dövründə ölkəmizin keçdiyi böyük inkişaf yolu, Azərbaycan dövlətçilik əsaslarının ciddi şəkildə möhkəmlənməsi, dövlətimizin hər gün daha da artan gücü, Azərbaycanın beynəlxalq müstəvidə mövqeyinin xeyli dərəcədə güclənməsi kimi nüanslar seçkilərdə bu qələbəni şərtlərdirən əsas amillər olmuşdur. Azərbaycan xalqı bütün bu amilləri nəzərə alaraq görülən işlərə yüksək qiymət vermiş, inkişafa, tərəqqiyə, təhlükəsizliyə, gələcəyə səs vermişdir.
2003-2018-ci illər ərzində Azərbaycanın keçdiyi inkişaf yoluna və tərəqqisinə baxsaq cənab Prezidentin qazandığı bu qələbənin heç də təsadüfi olmadığını görmüş olarıq. Həmin illər ərzində Prezident İlham Əliyevin rəhbərliyi altında həyata keçirilən xarici siyasət və nəticəyə hesablanmış diplomatik uğurlar Azərbaycanın BMT, AŞ, ATƏT, NATO və bütün digər nüfuzlu beynəlxalq təşkilatların yüksək tribunasından daha qətiyyətlə çıxış etməsi və bir çox məsələlərdə beynəlxalq aləmin onun rəyinə hörmətlə yanaşması üçün münbit şərait yaratmışdır. İlham Əliyevin özünün də vurğuladığı kimi, “Ancaq iqtisadiyyatı güclü olan ölkələr müstəqil siyasət apara bilərlər” ifadəsi 5 il ərzində ölkədə aparılan uğurlu siyasətin əsas prioritetlərindən biri olmuş və iqtisadiyyatımızın güclənməsi üçün əməli addımlar atılmışdır. 2003-2018-ci illər ərzində ümumi daxili məhsul 3,2 dəfə, büdcə gəlirləri 13,5 dəfə artıb. Ölkənin strateji valyuta ehtiyatları 26.6 dəfə artıb, maliyyə imkanlarımız əsaslı şəkildə yaxşılaşıb. Xarici ticarət dövriyyəsi 4,6 dəfə, ixracın həcmi altı dəfə artıb. Əhalinin nominal gəlirləri 8.6 dəfə, minimum əməkhaqqı 12.9 dəfə artıb. Belə ki, bu illər ərzində maaşlar təxminən 7 dəfə, pensiyalar 10 dəfədən çox artıb. 1 958 400 yeni iş yeri açılıb, 326.6 min nəfərə ünvanlı dövlət sosial yardımı verilib. O cümlədən sosial infrastruktur inkişaf edib, 3100-dən çox məktəb və 640-dan çox xəstəxana tikilib və təmir edilib. Bölgələrdə 43 Olimpiya İdman Mərkəzi yaradılıb. Eyni zamanda işsizliyin səviyyəsi 9.2 faizdən 5 faizə, yoxsulluğun səviyyəsi 44.7 faizdən 5.4 faizə enmiş, 245 min nəfər məcburi köçkün mənzillə təmin olunmuşdur.
Azərbaycanda həyata keçirilən uğurlu siyasətin iqtisadi göstəriciləri beynəlxalq arenalarda, yüksək tribunallarda öz yüksək qiymətini almışdır. Ölkəmizin əldə etdiyi yüksək iqtisadi inkişaf indeksləri dünyanın ən aparıcı ölkələri ilə müqayisə olunmağa başlamışdır. Davos Dünya İqtisadi Forumunun “2017-2018 Qlobal Rəqabətlilik Hesabatı”nda Azərbaycan 35-ci pillədə qərarlaşıb və MDB məkanında liderliyini qoruyub saxlayıb. Həmçinin, Azərbaycan dünyada ən çox islahat aparan 10 ölkədən biri kimi tanınıb. İKT sektorunun iqtisadiyyatda payı 3,7 dəfə artıb, ölkəmiz dövlət orqanlarında İKT-nin tətbiqi üzrə 14-cü olub. Ölkə ərazisində internetin tətbiqi genişləndirilib və internet istifadəçiləri əhalinin 78 faizini təşkil edib və Azərbaycanda yüksək texnologiyalar sürətlə inkişaf etmiş və ölkəmiz dünyanın məhdud sayda üzvü olan kosmik klubuna daxil olub.
Bildiyimiz kimi Azərbaycanda enerji sahəsində inkişaf və neft-qaz sənayesinin təkmilləşdirilməsi Ümummilli Lider Heydər Əliyevin adı ilə bağlıdı. Neft-qaz sənayesinin əsaslı inkişafı və özünün ən pik nöqtəsinə çatması isə Prezident İlham Əliyevin dövrünə təsadüf edir. 2003-2018-ci illərdə iqtisadiyyatın neft-qaz sektoru əsaslı şəkildə inkişaf etmiş, 15 il ərzində sözügedən sahəyə xüsusi diqqət göstərilmişdir. Ulu Öndər Heydər Əliyevin təməlini qoyduğu Bakı-Tbilisi-Ceyhan neft kəməri 2006-cı ildə istifadəyə verilmiş və ölkə böyük gəlirlər əldə etməyə başlamışdır. 2007-ci ildə Bakı-Tbilisi-Ərzurum qaz kəmərinin istifadəyə verilməsindən sonra Azərbaycan qaz ixrac edən ölkəyə çevrilmişdir. 2014-cü il sentyabrın 20-də digər bir nəhəng layihə olan “Cənub Qaz Dəhlizi”nin təməli qoyulmuş, 2018-ci il 29 may tarixində Bakıda “Cənub Qaz Dəhlizi”nin, 12 iyun tarixində isə Əskişəhərdə həmin dəhlizin mühüm hissəsi olan Trans-Anadolu (TANAP) qaz boru kəmərinin açılışı olmuşdur. Qeyd etmək lazımdır ki, 2020-ci ildən etibarən Dəhlizin üçüncü və sonuncu hissəsi olan Trans-Adriatik qaz boru kəmərinin istifadəyə verilməsi ilə birlikdə artıq Azərbaycan qazı Avropa ölkələrinə ixrac olunmağa başlanılmışdır. Enerji sahəsində inkişafın digər bir təzahürü elektrik enerjisi sahəsində yaşanmışdır. Ölkə daxilində enerji təminatı əsaslı şəkildə yaxşılaşmış, 30-dan çox elektrik stansiyası tikilmişdir. Onların generasiya gücü 3900 meqavata bərabərdir. Bununla bərabər Azərbaycan elektrik enerjisini idxal edən ölkədən ixrac edən ölkəyə çevrilmişdir.
2003-2018-ci illər ərzində Azərbaycan bütün sahələrdə öz itibah dövrünü yaşayıb. Həmin illər yol və nəqliyyat infrastrukturunun sürətlə inkişaf edən dövrüdür. Ölkəmizdə 15 min kilometr yeni yol çəkilişi təmin edilmiş, yeddi aeroport tikilmişdir ki, onlardan Heydər Əliyev adına Beynəlxalq Hava Limanı, Gəncə Beynəlxalq Hava limanı, Lənkəran Beynəlxalq Hava Limanı, Naxçıvan Beynəlxalq Hava Limanı, Qəbələ Beynəlxalq Hava Limanı, Zaqatala Beynəlxalq Hava Limanı və Balakən Hava Limanı beynəlxalq statusa malik hava limanları olmuşdur. Ölkədə su təchizatı məsələləri əsasən öz həllini tapmışdır. 2004-cü ildə Bakı sakinlərinin 29 faizi içməli su ilə təmin olunurdu. 2018-ci ildə bu rəqəm 81 faizə çatmışdır. Ölkə üzrə isə 2004-cü ildə təqribən 20 faiz əhali içməli su ilə təmin edilirdisə, 2018-ci il üçün bu rəqəm 67 faizə qədər artmışdır. 2003-2018-ci illər ərzində eyni zamanda kənd təsərrüfatının inkişafı üçün də böyük meliorasiya tədbirləri görülmüş, dörd böyük su anbarı tikilmişdir.
2003-2018-ci illər ərzində idman sahəsi də uğurla inkişaf etdirilmiş və böyük idman uğurları əldə olunmuşdur. İdmançılarımız 15 il ərzində Olimpiya Oyunlarında, dünya və Avropa çempionatlarında böyük qələbələr qazanmışlar. Azərbaycan həmin illərdə 7 Olimpiya Oyunlarında iştirak etmiş, Avropa Oyunlarında Azərbaycan ikinci yerə, İslam Həmrəyliyi Oyunlarında isə bütün müsəlman ölkələri arasında birinci yerə nail olmuşdur.
Prezident İlham Əliyev milli ideya ətrafında xalqı birləşdirib, Azərbaycançılıq məfkurəsini Azərbaycanda tam bərqərar etmişdir. Qeyd olunan illər eyni zamanda Azərbaycan Ordusunun sürətli inkişaf dövrüdür.Təchizat, silah-sursat, texnika, döyüş qabiliyyəti baxımından ordumuz güclü ordular sırasına daxil olub. Həmçinin, həmin illər ərzində əldə olunmuş iqtisadi inkişaf və aparılan effektiv xarici siyasət nəticəsində Ermənistan bütün regional layihələrdən təcrid olunub və beləliklə həm daxildə güclü ordu quruculuğu aparılmış, xarici əlaqələr sayəsində düşmənə sarsıdıcı zərbələr vurulmuşdur.
Bütün sadalanan amillər seçicilərin mütləq əksəriyyətinin Prezident İlham Əliyevə səs verməsinin səbəblərini ortaya qoyur. Əslində bu seçkilər həm də xalqın bütün destruktiv və xain qüvvələrə yox deməyinin təzahürüdür. 2018-ci ildə keçirilmiş seçkilər bir daha göstərdi ki, radikalların Azərbaycanın siyasi səhnəsində yeri yoxdur. Xarici qrant, ianə hesabına fəaliyyət göstərən, öz dövlətinə qarşı çıxış edən, bir çox hallarda milli satqınlıq nümayiş etdirən ünsürlərə Azərbaycan xalqı bir daha öz yerini göstərdi. Bu səbəbdən də 2018-ci ildə Azərbaycan xalqı Prezident İlham Əliyevə səs verməklə ölkədə aparılan demokratik islahatlara səs vermiş oldu.
