Xəbər verdiyimiz kimi, bu Şəmkirdə genişmiqyaslı təmizlik işlərinin aparılması məqsədilə rayonun bütün yaşayış məntəqələrində, magistiral yolların kənarlarında daxili iməclik keçirilib, 1000-dən çox yeni ağac əkilib.
İməclik zamanı prospekt və küçələrdə, yol kənarlarına yığılan tullantıların təmizlənməsi və ərazilərin dezinfeksiyası həyata keçirilib. Bu işlərdə kommunal xidmət əməkdaşları ilə yanaşı sakinlərimiz, xüsusilə də könüllülər yaxından iştirak ediblər.
Şəmkir Rayon İcra Hakimiyyətinin çağırışına qoşulan bütün iməclik iştirakçılarına təşəkkür edir, sakinlərimizə isə RİH adından bir daha MÜRACİƏT edirik:
Əziz sakinlərimiz,
Bu gün Şəmkirdə tarixə həssas münasibət, maddi-mənəvi irsin qorunması və bərpası, həyata keçirilən önəmli sosial layihələr, genişmiqyaslı quruculuq işləri dövlət müstəqilliyinin yaratdığı imkanlardan qaynaqlanır.
Bu gözəlliklərin qorunmasında isə Sizlərin dəstəyi çox vacibdir.
Son dövrlər ətraf mühitin çirklənməsi, bəzi ekoloji problemlərin çoxalması hər kəsi narahat etməyə başlayıb. Əslində, hər şey insanın öz əlindədir.
Rayonumuzun bütün ərazilərini zibilləyən də, təmiz saxlayan da bizik.
Təmizliyə riayət edilməsinə, ələlxüsus şəhərimizin küçələrində, parklarında və digər yerlərdə ətrafın zibillənməməsinə diqqətlə yanaşmalıyıq. Nəzərə almaq lazımdır ki, təmizliyə riayət edilməsi bizim özümüz üçün vacibdir və bilavasitə bizim özümüzdən asılıdır.
Siz hər gün Şəmkir şəhərində olan zaman zəhmətkeş insanlarla qarşılaşırsınız. Sübh tezdən işə gedəndə, işdən dönəndə, parklarda, küçələrdə, bir sözlə şəhərin hər yerində…
Bəlkə də çoxlarının diqqətini çəkməyiblər belə..
Amma onlar-şəhərimizin təzmizliyinə baxan kommunal işçiləri biz şəmkirlilər üçün həm qayğıkeş ana, həm qayğıkeş ata, həm həkim, həm bağban, həm də memardırlar.
Çünki onlar ana vətənimizin bir parçası Şəmkirimizin doğma küçələrini hər gün göz bəbəyi kimi qoruyan, bağlarındakı ağacları qabar əlləri ilə bəsləyən, təbiətin şıltaqlıqlarına hamıdan çox sinə gərən və ən əsası isə gözəlliyi ilə göz oxşayan, təmiz Şəmkirimizi bizə bəxş etməklə sağlamlığımızın keşiyində həkim qədər dayananlardır.
Əziz sakinlərimiz,
Xahiş edirik parklarda və küçələrdə işıqlandırma sistemlərinin qorunmasında, onlara kimlərinsə ziyan vurmasının qarşısının alınmasında, parkalarımızın, istirahət mərkəzlərimizin, küçə və xiyabanlarımızın, yol kənarlarının təmiz saxlanılmasında Sizlər də fəal olun!
Şəmkirimizin hər zaman təmiz görünməsi üçün sizlərin qayğıkeşliyinizə çox ehtiyacımız var.
