Qazaxıstanda baş verən hadisələr təkcə region ölkələrinin deyil, bütün dünyanın diqqət mərkəzindədir. Qazaxıstan iqtisadi cəhətdən Mərkəzi Asiya regionunda dominant dövlət sayılır. Ərazisinə görə dünyada 9-cu yerdədir. Bu ölkə öz sosial-iqtisadi göstərisilərinə görə MDB dövlətləri içərisində də aparıcı yerlərdən birini tutur. Ona görə də anacaq maye qazın qiymətinin artırılmasına görə Qazaxıstanda baş verənləri izah etmək mümkün deyildir. Bu hadisələrin arxasında xarici qüvvələrin olması ehtimalı çox böyükdür. İstər-istəməz yaxın keçmişdə müxtəlif beynəlxalq güclərin ərəb baharı adı altında həyata keçirtdikləri dövlət çevrilişlərini yada salmaq lazımdır. Bu xarici güclərin məqsədi bu vaxta kimi Qazaxıstanın əldə etdiyi uğurların üstündən xətt çəkmək və qaragüruhçu qüvvələrdən ibarət hakimiyyət qurmaqdır. Qazaxıstanın uğurlarını, xüsusilə sosial sahədə əhalinin maddi rifahının təmin edilməsi sahəsində qabaqcıl yerlərə çıxmasını, müasir ordu qurmağa başlamasını və yüksək iqtisadi inkişaf göstəricilərini bu qüvvələr heç cürə qəbul edə bilmədilər. Baş verənlər göstərir ki, bu hadisələrin kiçik bir sosial narazılıq fonunda baş verən hadisələr kimi qiymətləndirmək olmaz. Çünki Mərkəzi Asiyanın ən inkişaf etmiş və ictimai-siyasi sabitliyin mövcud olduğu bir ölkədə silahlı şəxslərin hüquq-mühafizə orqanlarına, hökumət binalarına hücum edib, törədilən cinayyətlər özbaşına baş vermiş hadisələr deyil. Qazaxıstanda baş verənlər kənardan idarə olunan hadisələrdir. Bu hadisələr maye qazın qiymətinin qaldırılması ilə bağlı qərarın qəbul edilməsindən sonra başladı. Nə hökumət nə də dünya hadisələrin belə inkişaf edəcəyini təxmin belə etmirdi. Bütn bunlar göstərir ki, bu, Qazaxıstanda mövcud olan hakimiyyəti dəyişmək məqsədilə həyata keçirilən bir layihədir.
Baş verən hadisələr göstərir ki, qazax xalqı, insanlar çox diqqətli olmalıdırlar, bu ixtişaşları planlaşdırıb həyata keçirənlərin oyunlarına alət olmamalıdırlar.
Rauf Əliyev,
Milli Məclisin deputatı
