«2022-ci ilin «Şuşa İli» elan olunması hər bir Azərbaycan vətəndaşının qəlbini iftixar hissi ilə doldurdu. Şuşa Azərbaycanın qədim tarixə malik olan şəhər mədəniyyətinin nadir və təkrarsız incilərindən biridir. Bu şəhər Azərbaycanın qədim tarixini özündə yaşadır. Qədim Şuşamız milli mədəniyyətimizin mərkəzi, poeziyamızın və musiqimizin beşiyidir. Dünyada bir neçə şəhər var ki, musiqi onun hər daşına, qalasına, ab-havasına hopmuşdur. Belə şəhərlər Avstriyanın Vyana, İtaliyanın Neapol, Azərbaycanın da Şuşa şəhəridir. Hətta xalq arasında məşhur kəlam vardır ki, “Şuşada körpələr bələkdə belə muğam üstündə ağlarlar”. Qarabağın tacı sayılan, təbii gözəlliyi, xarı bülbülü, zəngin meşələri, şəlalələri, tarixi-mədəni abidələri, Cıdır düzü, İsa Bulağı, Turş suyu ilə bir vaxtlar təkcə sakinlərini yox, respublikanın bütün bölgələrindən, xaricdən gələn qonaqların könlünü oxşayan Şuşa şəhəri XVIII əsrin 50-ci illərinin əvvəllərində Qarabağ xanı Pənahəli xan tərəfindən tikilib. İlk çağlarda şəhəri Şuşa adı ilə yanaşı, xanın şərəfinə Pənahabad adlandırırdılar. Onun hakimiyyəti illərində burada çoxlu abidələr tikilib. Oğlu İbrahimxəlil xanın hakimiyyəti illərində şəhər böyüyüb, müdafiə bəndləri və qalalar tikilib. Feodal ara müharibələri dövründə Şuşa bir neçə dəfə möhkəmlik sınağından uğurla çıxaraq qalib gəlib. Əsrlər boyu bu şəhər Azərbaycanın əsas siyasi və mədəni mərkəzlərindən biri idi və onun tarixi Azərbaycan dövlətinin tarixinin ayrılmaz bir hissəsidir. Artıq Qarabağımıza uzun illərdir gözlənilən yeni nəfəs gəlir. Xalqımızın qəlbində uzun illər bir yara kimi hər gün qanayan Qarabağ nisgili başa çatıb. Xalqımız öz qədim tarixinə, əzəli-əbədi torpaqlarına qovuşub. 2022-ci ilin «Şuşa İli» elan edilməsi o deməkdir ki, il ərzində əsas diqqət və resurslar ölkəmizin mədəniyyət paytaxtı olan Şuşanın və ətraf ərazilərin bərpasına, yenidən qurulmasına yönəldiləcək. 2022-ci ili Qarabağa qayıdışın başlanğıc ili kimi qəbul edə bilərik.»
Bu fikirləri «İki sahil» qəzetinə açıqlamasında Milli Məclisin deputatı Səbinə Xasayeva bildirib.
S.Xasayeva qeyd edib ki, işğaldan azad olunmuş bütün torpaqlarımızda genişmiqyaslı quruculuq, abadlıq işlərinin aparılması dövlətimizin bu sahəyə böyük önəm verdiyinin bariz nümunəsidir: «Azərbaycanın Vətən müharibəsində qalib gəlməsi ilə Qarabağ yenidən dirçəlməyə başladı. Bu torpaqlara həyatın qayıdacağı günlər isə çox yaxındadır. Biz əminik ki, aparılan quruculuq işləri nəticəsində Qarabağ əvvəlki əzəmətini bərpa edəcək. Ölkə Prezidenti bu möhtəşəm qərarı ilə diqqətə çatdırır ki, təkcə hərbi-siyasi yolla deyil, həm də mədəniyyət diplomatiyası ilə Şuşanın tarixən Azərbaycanın ayrılmaz parçası olduğunu hər kəs görəcək. Keçiriləcək tədbirlərlə ermənilərin yalanları əyani faktlarla ifşa ediləcəkdir.»
S.Xasayeva diqqətə çatdırıb ki, otuz il ərzində erməni vandalları bu torpaqlardan tariximizi, mədəniyyətimizi yox etməyə çalışdılar. Lakin bacarmadılar. Bu gün artıq həmin torpaqların əsl sahibləri geri dönüblər.” Ölkə Prezidenti cənab İlham Əliyevin işğaldan azad edilmiş ərazilərə, o cümlədən Şuşa şəhərinə hər bir səfəri bu torpaqların tarixən Azərbaycan xalqına məxsus olduğu və bundan sonra da əbədi olaraq belə qalacağı barədə bütün dünyaya verdiyi bir mesajdır. Bu gün artıq işğaldan azad edilmiş torpaqlarda ölkə Prezidenti cənab İlham Əliyevin rəhbərliyi ilə böyük vüsətlə quruculuq işləri aparılır. Şuşalıların doğma yurdlarına qaydışını təmin etmək üçün şəhərdə bütün zəruri işlər görülməkdədir. Artıq sakinlərin yaşamasını təmin edən bütün zəruri infrastruktur işləri, xüsusən də yollar salınıb, şəhərin fasiləsiz, etibarlı şəkildə elektrik enerjisi və su ilə təchizi baxımından işlər başa çatıb. İnsanların yaşaması üçün şəhərin Baş planı hazırlanıb və artıq yaşayış binalarının tikintisinə start verilib.
