İnanıram ki, mənim axıra çatdıra bilmədiyim taleyüklü məsələləri, planları, işləri Sizin
köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm.
Ulu Öndər Heydər Əliyev
Dünyanın nadir şəxsiyyətlərindən olan, öz peşəkarlığı, yüksək intellekti, zəngin təcrübəsi ilə seçilən, xalqın sonsuz etimad və məhəbbətini qazanmış Prezident İlham Əliyevin apardığı uğurlu siyasət nəticəsində ölkəmiz gündən- günə inkişaf edir. Həm daxili, həm də xarici siyasətdə əldə olunan uğurların ölkə başçımızın şəxsi nüfuzu ilə vəhdəti müasir Azərbaycanın müsbət beynəlxalq imicinin əsas mənbəyidir. Əldə etdiyi mükəmməl təhsili ilə əsil peşəkar diplomat və uğurlu dövlət xadimi kimi formalaşan Prezident İlham Əliyev öz çoxsahəli fəaliyyəti ilə elm, siyasət, dövlət quruculuğu və beynəlxalq münasibətlər sahəsində əldə olunmuş böyük uğurlara imza atmışdır.
Ulu Öndər Heydər Əliyevin yolunun və siyasi kursunun layiqli davamçısı Prezident İlham Əliyev milli həmrəyliyi, sağlam əməkdaşlıq mühitini və siyasi dialoqu təşviq edən demokratik lider olmağı, tariximizi, xalqımızı əsrlərlə ən çox ehtiyac duyduğu milli birlik məqamına çatdırmağı cəsarətlə bacardı. Prezident İlham Əliyevin “Biz birlikdə güclüyük” şüarı xalqın qalib ruhunun güzgüsüdür. Xalqın orduya inamı və dəstəyi, həmçinin ölkədə yaşanan milli və siyasi həmrəylik yaşadığımız Zəfər tarixinin ideoloji əsasıdır. Vətəndaşlarımızı milli birliyə dəvət edən Prezident xalqın dəmir yumuruq kimi birləşməsinin əsas səbəbkarıdır.
Dövlət və cəmiyyətin inkişafı naminə sağlam əməkdaşlıq mühitinin təşəbbüskarı olan Prezident İlham Əliyev bu əməkdaşlığın ümummilli məsələlərdə daha vacib olduğunu qeyd edir: “Ümummilli məsələlərdə heç bir fərqli fikir ola bilməz. Ümumi məsələlər Qarabağ məsələsidir. Ümumi məsələlər siyasi partiyaların fəaliyyətidir, demokratiyanın inkişafıdır, iqtisadi azadlıqların bərqərar olmasıdır, ölkəmizin güclənməsidir. Bu gün bu siyasi dialoq aparılır. Mən bunu çox təqdir edirəm. Hesab edirəm ki, ölkəmizin gələcək siyasi sisteminin təkmilləşməsi üçün bunun böyük əhəmiyyəti var.”
Bildiyimiz kimi Yeni Azərbaycan Partiyası bu gün regionun ən böyük və güclü siyasi partiyasıdır. YAP-ın son 16 illik tarixi Prezident İlham Əliyevin partiyaya sədrliyi dövrünə təsadüf edir. Bu müddətdə Cənab İlham Əliyevin sədrliyi ilə YAP-ın cəmiyyətdəki nüfuzu daha da möhkəmlənmiş və partiyanın təşəbbüsləri ölkəmizin siyasi sisteminin təkmilləşməsində əhəmiyyətli rol oynamışdır.
Qarşılıqlı etimada və milli maraqlara əsaslanan müstəqil siyasət həyata keçirən Azərbaycan bu gün beynəlxalq aləmdə siyasi sabitliyin, əmin-amanlığın, tərəqqinin, tolerantlığın məkanı kimi tanınır. Qlobal təşəbbüslərin müəllifi olan Azərbaycanın üçrəngli bayrağı irimiqyaslı ictimai-siyasi və mədəni tədbirlərdə, habelə nüfuzlu beynəlxalq təşkilatlarda əzəmətlə dalğalanır.Azərbaycanın 2011-ci ildə 155 ölkənin etimadını qazanaraq BMT-nin Təhlükəsizlik Şurasının qeyri-daimi üzvü seçilməsi də məhz ölkəmizin beynəlxalq aləmdə getdikcə artan nüfuzunun və sürətli iqtisadi inkişafının göstəricisidir.
Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan arasında 2021-ci il iyunun 15-də Şuşada imzalanmış Bəyannamə iki ölkə və onun xalqları arasındakı dostluq və qardaşlıqdan çıxış edərək Azərbaycan Respublikası və Türkiyə Respublikası arasındakı münasibətləri keyfiyyətcə yeni, müttəfiqlik səviyyəsinə qaldırmışdır. Bəyannaməyə əsasən tərəflər xarici siyasət sahəsində əlaqələndirməni və müntəzəm ikitərəfli siyasi məsləhətləşmələri həyata keçirir, həmçinin bu istiqamətdə Azərbaycan Respublikası ilə Türkiyə Respublikası arasında Yüksək Səviyyəli Strateji Əməkdaşlıq Şurası çərçivəsində birgə fəaliyyət göstərir. Tərəflər aktual xarakter kəsb edən, qarşılıqlı maraq doğuran beynəlxalq məsələlər üzrə həmrəylik və qarşılıqlı dəstək nümayiş etdirərək yaxın və ya üst-üstə düşən mövqedən çıxış etməklə ikitərəfli əməkdaşlığı dərinləşdirəcəklər və BMT, ATƏT, Avropa Şurası, Türkdilli Dövlətlərin Əməkdaşlıq Şurası, İslam Əməkdaşlıq Təşkilatı daxil olmaqla beynəlxalq və regional təşkilatlar çərçivəsində bir-birinə qarşılıqlı dəstək göstərəcəklər. Tərəflərdən hər hansı birinin fikrincə, onun müstəqilliyinə, suverenliyinə, ərazi bütövlüyünə, beynəlxalq səviyyədə tanınmış sərhədlərinin toxunulmazlığına və ya təhlükəsizliyinə qarşı üçüncü dövlət və ya dövlətlər tərəfindən təhdid və ya təcavüz edildiyi təqdirdə, Tərəflər birgə məsləhətləşmələr aparacaq və bu təhdid və ya təcavüzün aradan qaldırılması məqsədilə BMT Nizamnaməsinin məqsəd və prinsiplərinə müvafiq təşəbbüs həyata keçirəcək, bir-birinə BMT Nizamnaməsinə uyğun zəruri yardım göstərəcəklər.
Son üç ildə ölkəmiz Türkdilli Dövlətlərin Əməkdaşlıq Şurasına uğurla sədrlik edib. Bu dövr ərzində Prezident İlham Əliyev təşkilatın fəaliyyətinin gücləndirilməsi, türkdilli ölkələr və xalqlar arasında dostluq, qardaşlıq və əməkdaşlığın daha da möhkəmləndirilməsi istiqamətində ciddi səylər göstərib. Ölkəmizin sədrliyi dövründə Türk Şurasının digər mötəbər beynəlxalq təşkilatlarla, o cümlədən BMT, İslam Əməkdaşlıq Təşkilatı, ATƏT, İqtisadi Əməkdaşlıq Təşkilatı ilə səmərəli əməkdaşlıq münasibətləri davam etdirilib, Ümumdünya Səhiyyə Təşkilatı ilə faydalı əməkdaşlıq çərçivəsi qurulub. 2021-ci il 12 noyabr tarixində Prezident İlham Əliyev Qarabağın azad edilməsi işində göstərilən səylərə və türk birliyinin daha da güclənməsi işinə töhfələrinə görə Türk Dünyasının Ali Ordeni ilə təltif edilmişdir.
Azərbaycan tarixinin son 18 ilinə nəzər saldıqda qazanılmış beynəlxalq uğurlarla yanaşı, bütün sahələrdə sürətli daxili inkişafın, bütün regionlarda iri infrastruktur layihələrin icrasının şahidi oluruq.
Bölgələrin inkişafında Prezident İlham Əliyev tərəfindən təsdiq edilmiş regionların sosial-iqtisadi inkişafı ilə bağlı dövlət proqramlarının icrası böyük əhəmiyyət kəsb edir. Bu proqramların icrası çərçivəsində Respublikamızın digər bölgələrində olduğu kimi bizim rayonumuzda da böyük işlər görülmüşdür. İri infrastruktur layihələrin reallaşdırılması ilə yanaşı rayonumuzda qazlaşdırmanın 100%-ə çatdırılması, fasiləsiz enerji və içməli su ilə təminatın yaradılması, yollarımızın asfaltlanması, yeni bağça, məktəb, xəstəxana binalarının tikilməsi, yaşıllaşdırma və abadlıq işlərinin aparılması dövlətimizin və dövlət başçımızın bizlərə olan diqqət və qayğısının nəticəsidir.
Bildiyimiz kimi 44 günlük Vətən müharibəsi Azərbaycanın böyük Zəfəri ilə sonlandı. Azərbaycan Silahlı Qüvvələri Müzəffər Ali Baş Komandan İlham Əliyevin rəhbərliyi altında 44 gün davam edən Vətən müharibəsində düşmən üzərində qələbə çalaraq tarixi nailiyyətə imza atdı. Ölkənin 30 ilə yaxındır ki, pozulmuş ərazi bütövlüyünün bərpası və xalqımızın mədəniyyət beşiyi hesab olunan Şuşanın azad olunması Prezident İlham Əliyevin Zəfər zirvəsidir. 300 ilə yaxın idi ki, böyük qələbəyə ehtiyacı olan və on illər idi ki, ermənilərin hər dəfə müxtəlif azğınlıqları ilə qarşılaşan xalqımız və dövlətimiz nəhayət ki, qələbəyə imza ataraq tarixi ədaləti bərpa etməyə müvəffəq oldu. Belə ki, 2020-ci ilin 27 sentyabrında başlanan Vətən müharibəsi Ali Baş Komandan İlham Əliyevin qətiyyəti, xalqın birliyi və Ordumuzun gücü nəticəsində Zəfərlə sona çatdı.
Bu Zəfər biz füzulilərə 30 ilə yaxın işğal altında qalmış doğma torpaqlarımızı görmək, canlarını Vətən uğrunda fəda etmiş şəhidlərimizin qanlarını almaq, illərlə ziyarət edə bilmədiyimiz yaxınlarımızın məzarlarını ziyarət etmək imkanı bəxş etdi.
Bu Qələbə eyni zamanda regionda inkişaf və əməkdaşlıqlar üçün yeni imkanlar açdı.
Ərazilərin azad olunmasından dərhal sonra genişmiqyaslı yenidənqurma işlərinə start verilmişdir. Azərbaycan yalnız özünün maliyyə resurslarına arxalanaraq sıfırdan yeni şəhər və kəndlər salır. Qarabağın “yaşıl enerji” zonasına çevrilməsi istiqamətində görülən işlər, müasir texnologiyanın nailiyyətlərindən olan “Ağıllı kənd” layihəsinin artıq reallaşması, Zəngəzur dəhlizinin reallığa çevrilməsi Qarabağımızın tezliklə cənnətə çevriləcəyindən xəbər verir.
Son on səkkiz ildə Prezident İlham Əliyev on dörd dəfə Füzuli rayonuna səfər edib. Bu səfərlərin hər birində mühüm obyektlərin təməlqoymaları, açılışları reallaşdırılmış, camaatımızla səmimi görüşlər keçirilmişdir.
2020-ci il noyabrın 16-da Azərbaycan Prezidenti İlham Əliyev və birinci xanım Mehriban Əliyeva işğaldan azad olunan Füzuli rayonuna gəldilər. İlham Əliyev Füzuli şəhərində Azərbaycan bayrağını qaldırdı. Sonradan Füzuli-Şuşa avtomobil yolunun – Zəfər yolunun təməli qoyuldu.
Sevindirici haldır ki, bu gün dövlətimiz tərəfindən həyata keçirilən geniş miqyaslı tikinti-quruculuq və bərpa işləri bizim rayonun ərazisində də sürətlə davam etməkdədir. Cəmi 8 aya inşa olunan Füzuli Beynəlxalq Hava Limanı artıq ilk sərnişinlərini qəbul edir. Böyük strateji əhəmiyyətə malik Horadiz-Ağbənd dəmir yolu xəttinin çəkilişi uğurla davam edir. Bölgənin enerji təminatında xüsusi əhəmiyyət daşıyan “Füzuli” yarımstansiyasının açılışı artıq reallaşdı. Rayonumuzun ərazisində qurulan yol-nəqliyyat infrastrukturu ən yüksək texnologiyalar əsasında qurulur ki, bu da müasir standartlara cavab verir.
Füzuli şəhərinin işğaldan azad edilməsinin birinci ildönümündə ölkə başçısı cənab İlham Əliyevin və Birinci vitse-prezident Mehriban xanım Əliyevanın füzulilərlə birlikdə olması bizlərə böyük fəxr və qürur verdi. Həm Prezident cənab İlham Əliyev, həm də Birinci vitse-prezident Mehriban xanım Əliyeva hər zaman füzulilərə diqqət və qayğı ilə yanaşıblar. Rayonumuzun ərazisində dövlətimizlə yanaşı, Heydər Əliyev Fondu tərəfindən reallaşdırılan layihələr bizə olan xüsusi diqqətin nəticəsidir.
Bildiyimiz kimi Qələbə itkisiz qazanılmır. Vətən müharibəsində qazandığımız Zəfər də şəhidlərimizin qanı, qazilərimizin sağlamlığını itirməsi hesabına qazanıldı. Füzuli rayonundan 78 nəfər Vətən müharibəsi şəhidimiz, 300-ə yaxın qazimiz var. Rayonumuzdan 3 nəfər Vətən Müharibəsi Qəhrəmanı adına layiq görülmüşdür. Şəhidlərimizin əziz xatirəsi qarşısında baş əyir, Allahdan şəhidlərimizə rəhmət, qazilərimizə isə şəfa diləyirik.
Torpaqlarımızı işğaldan azad edib, 27 illik həsrətimizə son qoyduğuna, müharibənin bitməsindən bir il ötməsinə baxmayaraq, sürətli tikinti-quruculuq işləri apardığına, füzulilərə hər zaman diqqət və qayğı göstərdiyinə görə ölkə başçımız, Müzəffər Ali Baş Komandan cənab İlham Əliyevə və Birinci vitse-prezident Mehriban xanım Əliyevaya öz dərin minnətdarlığımızı bildiririk.
Bizi qalib xalqa çevirən Müzəffər Ali Baş Komandan cənab İlham Əliyevi 60 illik yubileyi münasibətilə ürəkdən təbrik edirik. Allahdan möhtərəm Prezidentimizə və ailəsinə möhkəm can sağlığı, xalqımızın rifahı və işıqlı sabahı naminə fəaliyyətində uğurlar, zəfərlər diləyirik!
Gülbahar Eyvazova
Füzuli RİHB-nin müavini, İctimai-siyasi və humanitar məsələlər şöbəsinin müdiri
