Əsli Kazımova: Yeni siyasi mühitin, yeni münasibətlər sisteminin formalaşdırılması Prezident İlham Əliyevin prinsipial mövqeyinin təzahürüdür
“Son illərdə ölkəmizdə aparılan uğurlu siyasi islahatlar kursu yeni siyasi konfiqurasiyanın formalaşmasına yol açıb. Siyasi partiyalar arasında münasibətlərin açıq və etibarlı müstəviyə yüksəlməsi məhz yeni siyasi konfiqurasiyanın töhfəsidir. Xüsusi olaraq vurğulanmalıdır ki, siyasi partiyaların əhəmiyyətinin artırılması, demokratiyanın inkişafı, iqtisadi azadlıqların bərqərar olması və ölkəmizin güclənməsi islahatların strateji hədəfləridir. İqtidar-müxalifət münasibətlərinin sağlam təməllər üzərində inkişaf etdirilməsi Prezident İlham Əliyevin dövlət siyasətini xarakterizə edən əsas göstəricilərdən biridir. Prezident İlham Əliyevin tapşırığı əsasında üzvlərinin sayından, ölkə ərazisini əhatə vəziyyətindən, siyasi çəkisindən və hər hansı digər amildən asılı olmayaraq ölkədəki bütün siyasi partiya rəhbərləri ilə keçirilmiş davamlı görüşlər demokratik ənənələrin şaxələnməsinə xidmət edən müsbət təcrübədir. Qısa zaman ərzində 9 yeni siyasi partiya dövlət qeydiyyatına alındı, vaxtı ötmüş qurultayların keçirilməsi məqsədilə bir sıra siyasi partiyaların yerlə təmin olunması üçün tədbirlər görüldu. O cümlədən, 30 siyasi partiyanın qurultaylarının keçirilərək nəticələrinin dövlət qeydiyyatına alınması, qərargahı olmayan 22 siyasi partiya üçün ofislər ayrılması istiqamətində addımlar atıldı. “Siyasi partiyalar haqqında” yeni qanun layihəsinin siyasi partiya rəhbərləri ilə müzakirəsinin aparılması, aktual mövzulara həsr olunmuş birgə iclasların keçirilməsi və müzakirələrin təşkili siyasi münasibətlərin yeni müstəvidə inkişafına yol açdı. Bütün bunlar ölkəmizdə yeni siyasi mühitin, yeni münasibətlər sisteminin formalaşdırılması istiqamətində Prezident İlham Əliyevin prinsipial mövqeyinin təzahürüdür”.
Bu sözləri Azərbaycan Sosial Rifah Partiyasının sədri Əsli Kazımova “İki sahil”ə açıqlamasında deyib.
Ə.Kazımova bildirib ki, ölkədə fəaliyyət göstərən siyasi partiyaların mütləq əksəriyyətinin siyasi dialoq proseslərinin fəal iştirakçıları olması faktı siyasi həmrəyliyin təzahürüdür: “Görülən işlərin məntiqi nəticəsidir ki, iqtidar-müxalifət dialoqu artıq ölkəmizin gündəlik siyasi təcrübəsinə daxil olub və davamlı şəkildə inkişaf edir. Bütün bunlar isə ölkəmizdə qarşılıqlı etimad mühitinin daha yüksək şəkildə təmin edilməsinə yol açır. Qarşılıqlı etimad mühitinin ən böyük nümunəsi isə siyasi partiyaların Vətən müharibəsi dövründə ölkə hakimiyyətinə, cənab Prezident İlham Əliyevə göstərdiyi dəstək oldu. Ölkəmizdə fəaliyyət göstərən siyasi partiyaların Ali Baş Komandan İlham Əliyevə dəstək ifadə edən birgə bəyanat və müraciətlər imzalaması həmrəylik mühitinin inkişafı ilə yanaşı, dayanaqlı demokratik ənənələrin formalaşmasına xidmət edən mütərəqqi təcrübəyə çevrildi. Dünyada az-az təsadüf edilən bir fakt – bütün siyasi qüvvələrin ölkə Prezidenti ətrafında birləşərək milli maraqlar uğrunda səfərbər olması ölkəmizdəki siyasi həmrəyliyin formulu kimi çıxış etdi. Siyasi partiyalar tərəfindən imzalanmış 8 birgə bəyanat və 2 müraciət uğurlu siyasi dialoqun və xalq-dövlət birliyinin təzahürüdür.”
Partiya sədri qeyd edib ki, postmüharibə dövründə də ölkədə sabitliyin qarantı olan və sağlam əməkdaşlıq mühitini doğuran siyasi dialoq ənənələrinə sadiqlik nümayiş etdirilir. Prezident İlham Əliyev hər zaman ölkəmizdəki dialoq mühitinin davam etdirilməsinin, dərinləşdirilməsinin vacibliyini önə çəkib.
Həmsöhbətimizin sözlərinə görə, Prezident İlham Əliyevin təşəbbüsü ilə təşviq olunan siyasi dialoq prosesində siyasilər ilə yanaşı, ölkənin elmi dairələri, vətəndaş cəmiyyətinin fəal üzvləri, gənclər hərəkatı, mətbuat və digər sahələrin nümayəndələri iştirak edirlər: “Partiyaların həmrəyliyi ölkəmizdə mövcud siyasi potensialın yalnız dövlətin inkişafına və milli maraqlara xidmət etdiyini göstərir.”
