Ermənistanın Azərbaycan torpaqlarını işğal altında saxladığı 30 ilə yaxın müddət ərzində cənab Prezident İlham Əliyevin rəhbərliyi altında Azərbaycan dövləti həqiqətlərimizin dünyaya çatdırılması istiqamətində ardıcıl, qətiyyətli və sistemli işlər həyata keçirdi. Dövlət başçımız bütün yüksək kürsülərdən Qarabağın əzəli Azərbaycan torpağı olmasını faktlarla əsaslandırırdı. 2008-ci ildə Heydər Əliyev Fondunun vitse-prezidenti Leyla xanım Əliyevanın təşəbbüsü ilə başlanmış “Xocalıya ədalət! kampaniyası Xocalı soyqırımının dünya miqyasında tanıdılması istiqamətində aparılan sistemli işin nəticəsidir ki, dünyanın 13 ölkəsi Xocalı qətliamını soyqırımı kimi tanıyıb. Müharibə zamanı bu tendensiya yüksələn xətlə inkişaf edərək özünün kuliminasiya nöqtəsinə çatdı. Cənab Prezident İlham Əliyevin “BBC News”, “CNN”, “France 24” kimi media agentliklərinə müsahibəsi günlərlə ölkə mətbuatının və dünya mediasının manşetlərindən düşmədi. Bu müsahibələr illər ərzində Azərbaycan xalqının qəlbində qübar bağlamış məsələlərin açıq, aydın və heç bir dairədən çəkinməyərək səsləndirilməsi, haqqın səsi idi.
Postmüharibə dövrü də ən az müharibə dövrü qədər həssas, sistemli və düşünülmüş yanaşma tələb edir. Bu reallığı da hər zaman olduğu kimi nəzərə alan və düzgün qiymətləndirməyi bacaran dövlət başçımız İspaniyanın və ispandilli auditoriyanın ən nüfuzlu media orqanlarından biri hesab olunan “El Pais” nəşrinə müsahibəsi həm zamanlama, həm də məkan baxımından müstəsna əhəmiyyətə malikdir. Azərbaycan həqiqətlərinin hər yerdə və hər zaman əsaslı və haqlı olduğu kimi Azərbaycanın dövlət başçısı da qalib dövlətin Müzəffər Ali Baş Komandanı kimi həm hal-hazırki mövcud siyasi situasiya haqqında məlumat verirsə, həm də qalib və məğlub iki cəmiyyətin psixoloji durumunun mövcud reallığını da rasional dəyərləndirməyi bacarır. Məlum məsələdir ki, Ermənistanda məğlubiyyətdən sonra mövcud olan gərgin vəziyyət yalnız ictimai-siyasi proseslərdə özünü büruzə vermir, bu məğlubiyyət həm də cəmiyyətin psixologiyasına siraət edib. Cənab Prezident bu baxımdan da bildirir ki, Azərbaycan qalibdir və Dağlıq Qarabağ münaqişəsi həll olunub və bu reallıq nəzərə alınmalıdır. Ermənistanda olan mövcud reallıqları da nəzərə alaraq dünyanın bir daha nəzərinə çatdırır ki, Azərbaycan qalib tərəf olaraq Ermənistana sülh təklif edir, Ermənistan da sülh razılaşması üzərində işləməli və XXI əsrdə normal davranışa riayət etməlidir. Bütün bunlara baxmayaraq hələ də Ermənistan cəmiyyətində, siyasi spektrində revanşizm əlamətləri görünür.
Müsahibəyə beynəlxalq ictimaiyyət tərəfindən olduqca böyük maraq göstərilir, onun fərqli hissələri müxtəlif başlıqlar altında manşetlərə çıxarılır. Bunun isə bir neçə səbəbi var. Əvvəla, bu amil qalib dövlət kimi Azərbaycana olan böyük maraqdan doğursa, bir digər tərəfdən də dünya mediasında da informasiya bolluğunun yaşandığı bir vaxtda regionda baş verən hadisələr haqqında müfəssəl və etibarlı məlumat, mövcud situasiya haqqında obyektiv şərhə ehtiyac səbəbindən doğur. Bu zəruri ehtiyac boşluğunun doldurulmasında bir amil mütləq vurğulanmalıdır ki, qarşı tərəfin zaman-zaman qəsdən təxribatlar edərək bir çox məsələlərin hələ də həll olunmadığı mənzərəsini yaratmağa çalışaraq beynəlxalq rəyi yanıltmaq, çaşdırmaq cəhdləri fonunda bu inam heç şübhəsiz ki, dövlət başçımızın qazandığı etibarlı imicindən, onun şəxsiyyətinə, sözünə olan güvəndən irəli gəlir. Bu baxımdan, cənab Prezident İlham Əliyevin “El Pais” nəşrinə müsahibəsi əsnasında səsləndirdiyi fikirlər, verdiyi mesajlar regionda gedən proseslər haqqında müfəssəl məlumat almaq, onları düzgün analiz etmək baxımından etibarlı mənbə qismində çıxış edir.
Dövlət başçımızın hər çıxışı, müxtəlif dillərdə verdiyi müsahibələrdə səsləndirdiyi fikirlər fraqmentlər şəklində sosial mediada da geniş şəkildə müzakirə olunur, önəmli baxış sayı əldə etməklə yanaşı, onun fikirlərinə dəstək “Twitter” kimi daha siyasi auditoriyanın kök saldığı şəxslər tərəfindən yenidən paylaşılıb, şərhlər yazılmaqla açıq şəkildə dəstək ifadə olunur. Bunun daha öncə də faktlarla əyani şəkildə şahidi olmuşduq. Ordumuz qarşı tərəfin məğlubedilməz erməni mifini dağıtdı, onları dənizdən dənizə “Böyük Ermənistan” röyasından ayıltdı, dövlət başçımızın müsahibələri də yalan üzərində qurulmuş ideoloji təbliğatı məhv edir.
Şəbnəm HƏSƏNOVA
Politoloq
