15 dekabr 2021-ci ildə Belçika Krallığının paytaxtı Brüsseldə Avropa İttifaqının Şərq Tərəfdaşlığı Proqramının VI Sammiti keçirilmişdir. Azərbaycan Respublikasının Prezidenti cənab İlham Əliyev Sammitdə iştirak edərək çıxış etmişdir. Prezident İlham Əliyev uğurla inkişaf edən Azərbaycan-Avropa İttifaqı əlaqələrinə diqqət çəkərək Avropa İttifaqı ilə Azərbaycan arasında 2018-ci ildə paraflanmış “Tərəfdaşlıq prioritetləri” sənədinin əhəmiyyətini vurğulayıb. Azərbaycanla Avropa İttifaqı arasında yeni tərəfdaşlıq sazişi üzərində işin 90 faizdən çoxunun artıq başa çatdırıldığını bildirən Prezident cənab İlham Əliyev sənədin qalan hissəsinin qarşıdan gələn dövr ərzində aparılacaq danışıqlar nəticəsində yekunlaşdırılacağına ümidvar olduğunu ifadə etmişdir. Dövlətimizin başçısı regional məsələləri daim gündəliyində saxladığına, bu proseslərə verdiyi töhfəyə və dəstəyə görə Avropa İttifaqı Şurasının Prezidentinə təşəkkürünü bildirmişdir.
Cənab İlham Əliyev Şarl Mişelin Ermənistanla Azərbaycan arasında münasibətlərin normallaşmasına verdiyi töhfəni vurğulamışdır. Həmçinin Şarl Mişelin təşəbbüsü ilə aparılan bu danışıqların çox praktiki olduğunu və təfsilatlı xarakter daşıdığını, burada Ermənistanla Azərbaycan arasında münasibətlərin normallaşması, sərhədlərin delimitasiyası və demarkasiyası, nəqliyyat infrastrukturunun, xüsusilə də dəmir yolu xəttinin çəkilməsi kimi məsələlərin müzakirə olunduğunu, nəticə etibarilə səmərəli və praqmatik keçdiyini diqqətə çatdırıb. Prezident İlham Əliyev Şərq Tərəfdaşlığının VI Sammitində Ermənistan ilə Azərbaycan arasında konstruktiv mühitin hökm sürdüyünü qeyd edib, belə bir mühitin yaradılmasında Avropa İttifaqının rolunu xüsusi vurğulayıb. Dövlətimizin başçısı bu imkanın əldən verilməməsi və yaranmış fürsətdən istifadə edərək regionda davamlı sülhün təmin olunması istiqamətində səylərin davam etdirilməsinin vacibliyini bildirib.
Dövlətimizin başçısı, eyni zamanda, Avropa İttifaqı ilə Azərbaycan arasında enerji sahəsindəki əməkdaşlığı qeyd edib, bu münasibətlərin də strateji tərəfdaşlıq xarakteri daşıdığını bildirib. Gələcəkdə Azərbaycan istehsal etdiyi qazın ixrac coğrafiyasını Avropa İttifaqının bütün üzv ölkələrinə genişləndirmək niyyətindədir. Azərbaycan qazının etibarlı və yeni mənbə olaraq Avropa İttifaqı bazarına çatdırılır və baş verən son hadisələr də enerji təhlükəsizliyi baxımından şaxələndirmənin vacibliyini göstərir.
1994-cü ildən bəri ölkəmiz “Sülh Naminə Tərəfdaşlıq” proqramı çərçivəsində NATO ilə sıx əməkdaşlıq edir. Azərbaycan üçün də bu önəmli proqramda iştirak böyük əhəmiyyət kəsb edir. Bu proqram çərçivəsində əməkdaşlıq, gələcəkdə ölkəmizin NATO da daxil olmaqla Avro-Atlantik məkana tam inteqrasiya olunmasında mühüm rol oynayacaq. Azərbaycan NATO-nun “Sülh Naminə Tərəfdaşlıq” proqramı ilə əlaqədar vaxtaşırı olaraq müxtəlif ölkələrdə keçirilən layihələrdə və tədbirlərdə uğurla, fəal iştirak edir. Azərbaycan NATO-nun zirvə toplantılarının işində ən yüksək səviyyədə təmsil olunmuşdur. Bütün bunlar Azərbaycanın dünyada artan iqtisadi və siyasi gücündən xəbər verir. Ölkəmizin Avropada nüfuzunun yüksəlməsi bütün dünya azərbaycanlılarının uğurudur.
Xumarə Familli,
Pirallahı Rayon İcra Hakimiyyəti başçısı Aparatının əməkdaşı
